CEBU, Philippines - Ipahigayon karung adlawa sa Integrated Bar of the Philippines (IBP) Cebu City Chapter ang manifesto signing alang sa pagsupak sa mandatory free legal aid services.
Kini agi’g pagsupak sa Bar Matter 2012 nga nag-require sa mga abogado sa nasud sa paggahin og 60 ka oras matag tuig alang sa libreng serbisyo ngadto sa mga kabus nga nagkinahanglan og legal nga serbisyo.
Matud sa presidente sa IBP Cebu City Chapter nga si Atty. Michael Yu nga kasagaran sa mga abogado aduna nay gipanghuptang mga kaso nga libre nilang gipanalipdan.
Sumala pa niya wala sila mangayo og bayad sa serbisyo agi og pagtuman sa ilang panaad nga moalagad sa mga tawong dunay giatubang nga mga kaso.
Matud pa ni Yu, nga ang paghimong mandatory daw usa na kini ka pugsanay.
Dugang pa niya nga adunay mga dili maayong manggawas unyang isyu ug komplikasyon kabahin niini.
Kini sama sa pag-monitor sa kadagkuan sa judiciary sa matag abogado ug sanglit mahimo mang magtumo-tumo nalang hinuon ang mga abogado sa pagbutang sa ilang oras aron makompleto ang ilang 60 oras nga free services.
Ang kahugpungan sa mga abogado sa Sugbu mopadangat sa ilang manifesto ngadto sa Korte Suprema sa ilang pagbabag niini human sa manifesto signing karung adlawa diha sa Palasyo sa Hustisya sulod sa Capitol Compound. - BANAT NEWS