Mga hepe sa 3 ka lungsod gilahugay ni Digal

CEBU, Philippines - Tulo ka mga hepe sa lalawigan ang gilahugay sugod kagahapon, duha kanila mga hepe sa mga lungsod diin mahitabo ang dagkong aksidente sa kadalanan sulod niining bulana.

Ang gilahugay mao sila si Supt. Teofilo Siclot, hepe sa Toledo City Police Station; Chief Insp. Resty Santos, hepe sa Balamban Police Station ug Chief Insp. Jovito Canlapan sa Minglanilla Police Station.

Si Siclot mao na karon ang Deputy Provincial Director for Operation (DPDO) samtang mopuli kaniya sa Toledo si Canlapan.

Samtang ang mopuli kang Canlapan sa Minglanilla mao si Santos samtang si Chief Insp. Januario Sario ang pangulo sa Administration Office CPPO maoy ibutang sa Balamban.

Si Supt. Tito Satera nga maoy gipulihan ni Siclot adto na ibalhin sa Police Regional Office (PRO)-7

Si Sr. Supt. Erson Digal, hepe sa kapolisan sa lalawigan nagkanayon nga niadto pa untang Hunyo 8 gitakda ang pagbalhin kang Siclot apan nauswag gumikan kay nagsingabot ang tinuig nga kapistahan sa dakbayan sa Toledo niadtong Hunyo 12 ug 13 ug ang pagbukas sa klase.

Gipasabot ni Digal ang iyang pagrelibo nila ni Siclot ug Santos walay kalambigitan ang nahitabong trahedya sa Cansumoroy, Balamban nga mikalas og 21 ka tawo, kadaghanan niini Iranians ug ang pagdaro sa trailer truck sa miaging adlaw diha sa barangay Poog dakbayan sa Toledo nga mikalas usab og upat ka mga tawo ug lain pang walo ang nangaangol.  – BANAT NEWS