CEBU, Philippines - Kadaghanan sa mga drayber sa JD Tours and Rent a Car nga gipakuha og written examination sa driving proficiency human sa ilang seminar sa Land Transportation Office-7 nangahagbong.
Ang maong kompanya gisuspeno ang operasyon gumikan sa aksidenteng mikalas og 21 ka tawo, 20 niini mga Iranians ug ang drayber nga si Jaime Batoon sa Cansumoroy sa lungsod sa Balamban niadtong Hunyo 13. Si Batoon mao ang kapuyo sa tag-iya sa maong kompanya nga si Mercelyn Marimon.
Gibutyag ni LTO-7 director Raul Aguilus atol sa interbyu Banat News nga 22 sa 31 ka mga drayber ang nahagbong sa written examinations bisan pa sila gipaubos una sa seminar niadtong miaging adlaw ug posibleng lugwayan pa ang suspensyon nga 30 ka adlaw sa maong kompanya.
Ang mag-refresher course kabahin sa defensive driving ug Traffic Laws sa nasud una pakuhaon og balik sa pasulit.
Si Sr. Supt. Erson Digal mibutyag nga base sa nakuhang mga dokumento sa task force nga gipangulohan ni Insp. Ruben Cuizon sa Provincial Investigation and Detective Management Branch (PIDMB) ug Balamban police pinangulohan ni Chief Insp. Resty Santos nagpakitang dunay rehistro ang sakyanan gikan sa Land Transportation Franchising and Regulatory Board (LTFRB) ug may endorsement sa Department of Tourism nga hatagan kini og prangkisa nga maka-operate og usa ka tourist buses.
Sa laing bahin, mopasar og resolusyon si Konsehal Edgardo Labella sa siyudad sa Sugbo aron ilhon ang mga indibidwal, grupo ug ahensya sa gobiyernong mitabang sa search and rescue and retrieval operation sa maong trahedya.
Base sa mga report, ang mga mirespondeng grupo mao ang pipila ka residente sa gihitaboan sa Cansumoroy sa Balamban ; Basak-Pardo Rescue Group; Emergency Rescue Unit Foundation; mga mountaineers; 78th Infantry Battalion; Philippine Air Force; Police Regional Office-7; Central Command ug uban pa. (BANAT NEWS)