CEBU, Philippines - Nangalumping ang kilid ug atop sa usa ka jeep nga pasaheroan dihang gibunalan ug gibato kini sa tulo ka mga dispatcher kinsa nasuko nga wala hatagi og tong sa drayber didto sa J. Panis Street, barangay Kasambagan, ning dakbayan sa Sugbo kagahapon sa alas 6:00 sa buntag.
Ang drayber nga si Alfredo Belbestre Cardenio, 28, ulitawo nga taga dakbayan sa Mandaue nagtibi nga misumbong ngadto sa kapolisan sa gidangatan sa iyang sakyanan.
Samtang usa sa tulo ka mga mibunal ug namato sa sakyanan nailhan lang sa ngalang Jayson, ug ang duha niini ka kauban wala hiilhi.
Matud pa ni PO2 Romel Oporto sa Mabolo Police Station, nga wala mohatag og tong si Cardenio kay wala siyay maayong kita gumikan sa kadyutay sa iyang pasahero.
Apan matud pa mihiwasa sa kasuko si Jayson ug ang duha ka kauban niini, ug sa ilang kalagot, mikuha kini og tubo nga puthaw ug gibunal-bunalan ang lawas sa jeep ug nangalumping kini.
Dihang mipabulhot og padagan si Cardenio, gibato pa gyud ang atop sa iyang sakyanan hinungdan nga nangalumping usab kini.
Hinuon walay mga pasahero siyang naangol, samtang ang kapolisan naniid na karon sa maong mga dispatser. (BANATNEWS)