CEBU, Philippines - Naaberya ang mga flights sa domestic ug international flights sa Ninoy Aquino International Airport (NAIA) human gipakanselar sa Civil Aviation Authority ang pagpalupad ug pagdawat niini og mga abyon kagahapon.
Base sa report sa ABS-CBN News nga ang power supply sa VHF Omni-directional Ranger (VOR) finder system sa NAIA naguba hinungdan nga kapin sa 50 ka flights ang naapektahan.
Ang nahisgutang instrumento maoy modeterminar sa mga moabot nga eroplano nga motugpa diha sa runway ug peligro panahon sa gabii.
Sugod kagahapon sa hapon ang mga tinugyanan sa airport mikanselar sa incoming ug outgoing nga mga flight.
Sa samang report, si Lito Casaul, technical assistant sa NAIA mibutyag nga ang air navigation specialist ang misuway sa pag-ayo sa VOR niana pang alas 7:30 sa buntag kagahapon apan napakyas.
“It’s incumbent on the airlines to decide on what to do with their flights. Airlines may decide either to cancel or divert their aircraft to their alternate or other airports”, ni Casaul pa sa iyang pamahayag sa ABS-CBN News. Ang VOR gikatakdang maayo karong adlawa (Domingo) sa alas 8:00 sa buntag. Walay gitugotan nga motugpa nga mga eroplano sa airport sukad kagahapon sa mga alas 6:27 sa gabii hangtud karong adlawa sa alas 8:00 sa buntag. (BANATNEWS)