CEBU, Philippines - Gituohang gi-salvage ang usa ka lalaking gidudahang gilabay nalang ang patay’ng lawas sa bakanteng lugar sa barangay Lower Linao Lipata lungsod sa Minglanilla niadtong Huwebes sa alas 4:00 sa hapon.
Ang biktima nga padayon pang giila sa kapolisan gibanabanang dunay gitas-on nga 5’4 ngadto sa 5’5, hingkod na ang panuigon, kasarangan lang ang pamarog, tabunon ang pamanit ug nagsul-ob og maong nga karsones ug kolor blue nga t-shirt ug blue nga tsenilas.
Matud ni PO1 Edward Belasco sa Minglanilla Police dihang nahinabi sa Banat News usa ka nagpailang concerned citizen ang mitawag kanila ug nagpahibawo sa patay’ng lawas nga nakit-an sa maong lugar.
Atol sa pag-responde sa kapulisan nagbuy-od na ang bitkima nga nagkadugo ug dunay lungag sa ulo agi sa gituohang pinusilan.
Matud ni PO1 Belasco gituohan nila nga didto gipatay sa laing lugar ang biktima ug diha lang sa maong dapit gilabay sanglit way bisan usa ka mga molupyo ang nakamatikod nga dunay nahitabong komosyon o buto-buto sa armas pipila ka oras sa wala pa makit-i ang maong patay’ng lawas.
Pagkakaron padayon pa ang follow up investigation sa kapulisan pag-ila sa biktima ug pagtumbok sa mga suspek ug sa motibo sa maong krimen sanglit naglisod ang kapulisan pagtumbok niini gumikan kay walay bisan usa sa mga molupyo sa maong dapit ang nakaila niini nga gituohang taga laing lugar. - Uban sa report ni Lalaine Mae Calatrava (BANAT NEWS)