Unang adlaw sa klase malinawon

CEBU, Philippines - Malinawon ang unang adlaw sa pagtungha sa mga kabataan sa elementarya ug sekondarya sa Metro Cebu gumikan sa hugot nga seguridad nga gihimo sa kapolisan.

Sa dakbayan sa Lapulapu, si Lapulapu City Police Office Director Sr. Supt. Mariano Natu-el Jr. mibutyag nga adunay 73 ka tunghaan silang gibantayan, 17 niini pribado.

Ang kapolisan mi-deploy sa ilang mga sakop pagbantay sa dalan hangtud na diha mismo sa mga tunghaan inabagan sa mga barangay tanod.

Gikalipay usab ni Natu-el ang pag-activate sa mga tunghaan sa ilang Junior Police and Parents Brigade nga lakip sa nagmonitor sa ilang kaugalingong tugkaran aron malikay sa dautang elemento ang mga kabataan.

Si Superintendent Henry Biñas, hepe sa Talisay City Police Station sa pakighinabi niini kagahapon sa Banat News nagkanayon nga ang mga tunghaan nga nahimutang diha sa kabarangayan sa ubos nga bahin sa siyudad o “low land” sama diha sa barangay Lawaan, Tabunok, Tanke ug Cansojong gipakatapan niya og mga polis.

Apan kadtong nahimutang sa bukirang barangay sama diha sa Jaclupan ug Maghaway duna lang siya’y gipa-roving tungod sa kakuwang sa ilang manpower o mga polis

Samtang sa dakbayan sa Sugbu, sayo pa lang sa buntag gipakatap na ang kapolisan diha sa mga tunghaan.

Si Sr. Supt. Patrocinio Comendador mipasidaan sa mga ginikanan nga ang labing peligro sa mga bata mao ang disgrasya sa kadalanan ug kinahanglan ang maghatud sa mga bata nasuhito sa siyudad. - Bong Soriano, Brenda Batuto ug Lesley Caminade (BANAT NEWS)