Lola angol sa toy gun nga gibalaha'g jolen

CEBU, Philippines - Naangol ang usa ka apohan dihang giluthang ang agtang niini   sa iyang 12-anyos nga apo gamit ang pusil-pusil nga gibalahan og jolen, didto sa barangay Bakyawan, lungsod sa Tuburan, sa miaging Sabado sa hapon.

Ang biktima mao si Magdalina Butaslak, 64, nga taga Bakyawan, ug usa ka mag-uuma.

Si PO2 Ariel Maravillas sa Tuburan Police Station mibutyag sa Banat News nga natulog ang biktima sulod sa iyang payag nianang alas 4:00 sa hapon dihang hilom nga misaka ang iyang 12-anyos nga apo nga lalaki.

Unya ang maayong pagkahinanok nga apohan, napugwat nalang dihang mihagtok ang duha ka jolen gikan sa pusil-pusil sa iyang apo ngadto sa iyang agtang.

Wala masayod ang apohan sa hinungdan nganong gipusil siya pag-unay sa iyang apo.

Ang apohan nga gibati og kalipong gumikan sa pagkaigo sa iyang agtang nagpadala sa iyang kabanay ngadto sa Tuburan District Hospital (TDH) arona mapasusi ang agtang.

Matud pa ni PO2 Maravillas nga wala usab nila ikahinabi ang biktima ug ang kabanay niini kay walay miadto sa ilang buhatan sa pagtaho sa maong hitabo.

Ang impormasyon nga miabot sa ilang buhatan naggikan na sa TDH.

Dili lamang kini ang unang higayon nga adunay naangol sa pusil-pusil nga gibalahan og jolen. Usa ka bulan na ang nakalabay, usa ka 7-anyos nga batang lalaki ang maayong pagkapusa sa mata dihang napusilan sa mata sa toy gun nga gibalaha’g ‘jolen’ sa iyang kaduwa diha sa sitio Cogon, barangay Aguho lungsod sa Daanbantayan.

Ang toy gun gi-improvised sama sa ‘boga’ kon lantaka karon nga adunay igniter sa lighter ug gibutangan og fluid ug ang nagsilbing barrel mao ang tubo nga igo rang masulod ang jolen. - BANAT NEWS