CEBU, Philippines - Usa ka karaang tunnel nga gibuhat panahon pa niadtong World War II nga nahimutang sa Salinas Drive Extension, barangay Lahug, dakbayan sa Sugbo ang giingong nahugno kagahapon sa buntag sumala pa sa report sa DyAB.
Ang maong tunnel gibana-banang dunay gilawmon nga 30-40 ka tiil ug ang lungag unom ka metros ang gilapdon. Gituohang ang pagsige karon og uwan maoy nakaingon sa pagkahunlak niini.
Sumala pa sa maong report dunay duha ka balay nga nagpatong ibabaw sa tunnel, usa niini gipanag-iya ni SPO3 Raul Regidor nga nadestino diha sa Cebu City Police Office (CCPO). Ang pamilya ni Regidor daling gipabakwit ngadto sa pikas nilang balay sa kabalakang magpadayon pa og dahili ang yuta.
Ang Cebu City Disaster Coordinating Council mipasidaan sa mga residente diha sa duol sa tunnel nga magmabinantayon aron mahilayo sa disgrasya. Ang mga opisyal sa barangay misusi na usab sa lugar ug mipasidaan sa mga residente.
Ang kapolisan mibutang na og yellow line sa lugar ug gipang-ugsukan kini og mga lubi aron walay makaduol sa lugar. Ang maong tunnel gikatahong maoy gipanggamit sa mga sundalong Pilipino ug Hapon panahon sa ikaduhang gubat. – BANAT NEWS