Ruso gibunalan sa tulisan

CEBU, Philippines - Naangol ang usa ka Russian national human gibunalan og puan sa kalibre .45 nga pistola sa wala mailhing tulisan nga nagsakay og motorsiklo sa Mactan Solid Towns Home, dalan General Aviation Road, barangay Basak, dakbayan sa Lapulapu sa miaging gabii.

Si Shiochiongco Kisemba, 22, ulitawo nga usa ka Ruso ug temporaryong nagpuyo sa nahisgotang lugar kasamtangan karong nalandig sa Chong Hua Hospital sa dakbayan sa Sugbo.

Si PO3 Elmer Canillo sa kapolisan sa maong dakbayan miingon nga gikan pa sa Minglanilla si Kisemba nga nagsakay og taxi nga gimaneho ni Romeo Campus nga taga Tunghaan, Minglanilla.

Sa ilang paghidangat duol sa gate sa nahisgutang subdivision sa barangay Mactan, kalit lang mi-overtake ang asul nga motorsiklo nga giluwanan sa tulo ka wala mailhing lalaki.

Ang motorsiklo mihunong sa unahan ug ang duha ka tulisan nagdali sa pagkanaog ug gisugat ang taxi nga giluwanan ni Kisemba dayong tion sa armas ug mideklarar og tulis.

Gibunlot sa tulisan ang shoulder bag ni Kisemba kinsa nagdumili usab sa paghatag niini nga maoy hinungdan nga nahitabo ang pagbinunlotay nga misangko sa paghapak sa puan sa pistola sa ulo sa biktima nga maoy nakasamad niini.

Ang guwardiya sa Mactan Solid Town Homes nga nakamatikod sa komosyon nakasinggit sa pagbadlong apan gipusil kini sa tulisan sa makadaghang higayon ug suwerte na lang nga dali nga nakahupo ug window glass lang ang naigo.

Matud pa ni PO3 Canillo nga nagdali sa pagsakay og balik ang duha ka tulisan sa nagpaabot nga motorsiklo ug nakasibat pahilayo sa maong dapit.

Ang Emergency Rescue Unit Foundation (ERUF ) nga lakip sa mitubag sa alarma uban sa kapolisan maoy midala ni Kisemba sa tambalanan.

Matud pa ni PO3 Canillo nga sa dapit diin nahitabo ang mao untang pagpanulis ilang nakaplagan ang kabhang sa bala nga kalibre .45 nga ilang gituohan gikan sa armas sa mga tulisan. – BANAT NEWS