RA 9165 paamendahan atol sa 15th Congress

CEBU, Philippines - Iduso ni kanhi Dangerous Drugs Board undersecretary Paul Clarence Oaminal sa pagbukas sa 15th Congress ang pag-amendar sa pipila ka probisyon sa balaod pagpaubos og drug rehabilitation niadtong mga nagumon sa bisyo sa gidiling drugas.

Kini human gihulagway ni Oaminal nga karaan na kaayo ug dili na haom ang maong mga probisyon karun sa kasamtangang balaod nga RA 9165 human usab gideklarar sa Korte Suprema nga unconstitutional ang pagpaubos og drug test niadtong mga akusado nga madakpan nga mag-atubang lang og silot nga ubos sa unom ka tuig.

Gitumbok ni Oaminal ang Sec.54 sa (Voluntary Submission of a Drug Defendant to Confinement, Treatment and Rehabilitation), Sec.61 (Compulsory Confinement of a drug defendant who refuses to apply under the voluntary submission Program) ug ang Sec. 62 (Compulsory Submission of a drug defendant charged with an offense to treatment and Rehabilitation).

Tinguha ni Oaminal nga ma-amendahan kining maong mga probisyon aron mahatagan og 60 ka adlaw nga lugway ang pag-isyu og order alang sa temporary custody niadtong dinakpan nga mo-aplay sa application for treatment.

Gipasabot ni Oaminal nga makonsiderar nga way kapuslanan ang maong mga probisyon karun sa balaod tungod kay walay drug defendant ang gustong moboluntaryong mapaubos sa rehabilitation.

Si Oaminal una nang mipadayag nga lisod gyud ang gitinguha nga pagpa-rehab sa kontrobersyal nga sinagop ni Talisay City Mayor Socrates Fernandez nga si Joavan kun dili mo kooperar ang mga ginikanan niini.

Si Fernandez nakadawat karun og daghang mga awhag nga ipa-rehab ang sinagop niini tungod kay kanunay lang kining makontrobersya.

Bag-uhay lang nakapiyansa si Joavan human kini pasakai og kasong illegal possession of firearms, Comelec gun ban violation ug threats tungod sa pagreklamo sa usa ka nurse nga si Vincent Castrodes nga gitiunan siya og armas sa anak sa mayor human sila diriyot magbanggaay diha sa barangay Tabunok sa dakbayan sa Talisay niadtong nakalabay’ng Biyernes.  - BANAT NEWS