Taxi driver sikop kay nanglungkab

CEBU, Philippines - Taxi driver gisikop human mo-uban sa tulo ka mga manglungkabay nga nanglungkab og internet café sa barangay Buagsong, lungsod sa Cordova kagahapon sa kaadlawon. Si Ronilo Bermejo, 40, drayber sa Pigy’s and Wiggles Taxi (GXF-165), taga dalan B. Rodriguez, Sambag II, nasikop human masubay sa kapolisan ang plate number sa Land Transportation Office. Ang taxi nga gimaneho ni Bermejo maoy gisakyan sa mga tawo nga nanglungkab sa Pinknet Café nga gipanag-iya ni Ma. Theresa Jumao-as. Gilungkab kini ginamit ang bolt cutter. Usa ka saksi mitug-an sa kapolisan sa Cordova nga nakakita siya nga gipidpid og maayo ang taxi sa internet café ug gipangkarga ang mga computer sets.

Matud pa ni Jumao-as nga 17 ka screen monitors, unom ka mga LCD flat screens ug digital camera ug uban pang mga gamit ang nadala sa grupo ni Bermejo.

Human mahatag sa saksi ang plate number, sila si Sr. Insp. Felix Pacaldo, hepe sa Cordova Police Station, misusI sa LTO ug diha nila nahibaw-an ang garahian niini ug si kinsa ang drayber niadtong tungora sa maong taxi unit.

Si Bermejo diha madakpi sa ilang pinuy-anan ug maoy mitultol sa kapolisan diin gibaligya ang ilang mga kinawat.

Matud pa ni Pacaldo mga alas 7:00 sa milabay’ng gabii nila nakuha pagbalik sa barangay Ermita ang pito nalang ka mga computer sets ug ang digital camera.  – BANAT NEWS