Manghod nga mipatay sa maguwang gikiha na

CEBU, Philippines - Gitakda kagahapon nga pasakaan og kasong homicide sa provincial prosecutor ang usa ka manghod kinsa miunay og pusil patay sa iyang maguwang nga usa ka enforcer tungod sa tubig niadtong Miyerkules sa buntag sa sitio Pundok Balay, Kalabera, barangay Pandan, dakbayan sa Naga.

Si PO2 Ronald Caño sa Naga Police Station mibutyag sa Banat News kagahapon nga nahuman na ang affidavit sa mga polis ug complainant apan ang asawa sa biktima kinsa maoy kihante maoy ilang   gipaabot tungod kay sa pagsuwat ning balita wala pa kini motungha sa buhatan sa kapolisan.

Kahinumdoman nga si Vicente Bacaro, 48, nga taga Pandan , giunay og pusil patay sa iyang manghod nga si Leonides Bacaro, 34.

Gani ang suspetsado nalandig sa South General Hospital tungod sa samad sa ulo niini human kini pusposi sa suspetsado og kalibre .45 nga pistola.

Matud ni Caño nga base sa ilang nahipos nga report nga tungod sa huwaw ug kainit sa panahon, ang atabay sa maong dapit hinay na kaayo ang tubod, busa nagkasabot ang managsilingan nga tag-unom lang ka container ang ilang sag-ubong tubig matag adlaw sa matag balay aron mabahin-bahin ang tubig.

Sa wala pa mahitabo ang dugoong krimen, si Francisca, ang asawa ni Vicente , nagdala og pito ka container nga sudlan niya og tubig. .

Dihang napuno ang maong mga container, si Leonides nga iyang manghod, nagbagolbol na busa nagkatinubagay kini ug si Francisca.

Si Francisca miuli dayon sa ilang balay nga nag-alsa sa usa ka container nga gikutasan ug gisukit kini sa iyang banang si Vicente.

Human hisayri sa biktima ang nahitabo, miadto usab dayon kini sa atabay ug gidukdok niya sa iyang pistola ang ulo sa suspetsado nga misangpot sa ilang pagsinumbagay.

Apan nadiskuntento ang manghod sa gibuhat sa iyang maguwang ug milanit kini sa iyang armas ug dihadiha gipusil ang biktima.

Matud pa ni Caño nga naabtan na lang ni Francisca ang iyang bana nga nagbuy-od na daplin sa atabay nga naligo sa dugo tungod sa mga samad pinusilan niini sa ulo, tiyan ug kamot.

Napunitan sa mga polis duol sa patay’ng lawas sa biktima ang kalibre .45 nga pistola nga may usa ka magazine ug usa ka buhing bala.

Samtang ang asawa sa suspetsado nga si Rebecca misurender sa kalibre .38 revolver nga adunay lima ka kabhang nga bala ngadto sa mga polis.

Sa pagsuwat ning maong balita ang suspetsado nagpabilin pa sa South General Hospital tungod kay wala pa kini tugoti sa doktor nga makagawas sa maong tambalanan apan gibantayan kini og mga polis. – BANAT NEWS