Plebisito sa Banawa karon nang Hulyo

CEBU, Philippines - Si Kongresista Antonio Cuenco sa habagatang distrito sa siyudad sa Sugbo mitumbok nga iyang gipaningkamutan nga madayon ang na-oktabang plebisito sa pagbuwag sa Banawa-Englis gikan sa barangay Guadalupe karong sunod nga bulan.

Nakita ni Cuenco nga wala nay makababag pa sa pagpahigayon sa maong plebisito sa barangay Guadalupe.

Matud pa ni Cuenco nga gusto siyang mahingpit ang iyang panaad ngadto sa katawhan sa Banawa-Englis nga mabuwag sa Guadalupe aron mahimong lain nga barangay sa dili pa hingpit nga matapos ang iyang katapusang termino.

Si Cuenco nagkanayon nga dili na makasalikway sa pagtagad ang Commission on Elections (Comelec) sa iyang hangyo nga madayon ang nahisgutang plebisito tungod kay wala na silay gi-asikaso karon sanglit human na ang labing unang automated election niadtong Mayo 10.

Sigon pa ni Cuenco nga dili na usab makabalda pa ang iyang mga kaatbang sa politika nga buot mobabag sa maong plebisito sanglit nalibkas na man ang gipagawas nga temporary restraining order (TRO) sa korte.

Masaligon si Cuenco nga matakda na ang plebisito sa Guadalupe sa dili pa siya makakanaog sa kongreso karong Hunyo 30.

Kini aron may dako nang kaseguroan nga ang mga molupyo sa Banawa-Englis makaapil na og pili sa ilang bag-ong mga barangay officials sa umaabot nga barangay election sa Oktobre ning tuiga. - BANAT NEWS