Hantakan sa Kamagayan gi-ronda, 4 nadakpan

CEBU, Philippines - Hepe sa kapolisan sa syudad sa Sugbo muduso og report sa Department of Interior and Local Government kon DILG gumikan sa naghitak nga ilegal nga sugal sa barangay Kamagayan ug nahitabo diha sa presensya sa kapitan sa miaging adlaw.

Matud pa sa hepe sa Investigation and Detection Management Branch kon IDMB George Ylanan nga adunay mireklamong naghitak ang sugal diha sa maong barangay ilabi na ang hantak.

Tungod sa maong taho daling mipahigayon og operasyon gipanguluhan ni SPO1 Filomeno Mendaros, naaktuhan nilang naghantak sila si Manuel Lim, 43, Arnold John Dela Cerna, 34, taga dalan Tres de Abril, barangay Labangon; Xavier Gonzales, 34, taga dalan Abellana barangay Guadalupe ug Ronie Ipoc, 20, taga barangay Day-as. Human niini giguba sa kapolisan ang gihimong tolda sa hantakan ug giputol ang linya sa kuryente niini nga gireklamo sa mga residente.

Si Sr. Supt. Patrocinio Comendador, director sa Cebu City Police Office mibutyag nga moduso sila og report kabahin niini ngadto sa buhatan sa DILG kini tungod kay aduna silay nadawat nga impormasyong diha sa maong hantakan si Kapitan Celestino Avila atol sa pagkasikop sa upat.

Gihulagway ni Comendador nga ang barangay officials unta ang mag-una sa pagpamuyag sa higayon nga ang ilang barangay gisalagan na og sugalan.

Si Ylanan mibutyag nga ang maong hantakan dugay nang nag-operate apan wala aksyoni sa barangay officials.

Gisuwayan sa pagkuha sa Banat News ang habig ni Avila apan dili makontak ang telepono niini. (BANATNEWS)