Gwen mihimakak sa pasangil ni Greg

CEBU, Philippines - Kusganong gipanghimakak ni Gob. Gwendolyn Garcia ang pasangil nga gibato kaniya ni Bise Gob. Gregorio Sanchez nga nanghilabot siya sa pagpili sa mga miyembro sa Provincial Boards nga maoy molingkod sa mga nagkadaiyang mga committee chairmanship sa hunta probinsiyal.

Matud pa ni Garcia nga wala siya mag-appoint sa mga kaalyado niining mga provincial board members kun si kinsa ang makalingkod sa mga chairmanship sa provincial board tungod kay dili man kini iyang gahum.

Si Sanchez nakasaway niini human mogawas sa balita nga nakigtagbo si Garcia sa mga napiling bokal sa usa ka uptown hotel ning dakbayan, ug nagduda kini nga nangimpluwensya nang daan ang gobernadora, butang nga gihimakak dayon ni Garcia.

Iyang gipasabot nga ang iyang pagpakigtigom niadtong nakalabay nga semana nasulagma lamang nga nahisgutan ang chairmanships.

Apan iyang gitataw nga iyang gipasagdan ang panagsabut sa mga provincial board members ug igo lamang naminaw sa buot moangkon sa chairmanship sigo sa ilang naantigohan.

Dugang pa sa gobernadora nga dili angayan mag-panic si Sanchez sanglit dili man niya poder ang Hunta Probinsiyal. (BANATNEWS)