Nabiyaang butang sa pasahero giuli sa drayber

CEBU, Philippines - Giuli sa usa ka drayber sa taxi ang nahibiling mga butang nga nabiyaan sa iyang pasahero sa miaging gabii didto sa dalan A.S. Fortuna sa barangay Banilad, dakbayan sa Mandaue.

Ang nahisgutang drayber mao si Crisanto Maoy, 26, ulitawo nga lumad nga taga San Remegio, Cebu, ug kasamtangang nagpuyo sa barangay Guizo, dakbayan sa Mandaue ug drayber sa V and N taxi.

Si PO3 Joselito Catabas sa Investigation Detection and Management Bureau (IDMB) nga nahinabi sa Banat News miingon nga ang maong mga butang nga naglakip sa laptop, digital camera, traveling bag nga puno sa mga sapot, alahas ug uban pa, nga gipanag-iya sa usa ka Ruth Lagrosa, hingkod, nga lumad nga taga Tagbilaran, Bohol.

Matud pa ni PO3 Catabas nga nangayog panabang sa ilang buhatan si Lagrosa sa pagpangita sa giluwanan niyang taxi nga maoy nabinlan niya sa maong mga butang dihang nakalimot siya sa pagdiskarga niini.

Samtang si Maoy miasoy usab ngadto sa mga otoridad nga nagkabuang usab siya sa pagpangita sa tag-iya dihang namatikdan niya ang maong mga kargamento nga diha sa iyang sakyanan, busa mibalik siya ngadto sa lugar diin manaog si Lagrosa.

Si PO3 Catabas miingon nga didto naabtan ni Maoy si Lagrosa ug puwerting lipaya niini nga nahibalik ang iyang mga mahalong butang. - BANAT NEWS