Soc wa pa gani kapanumpa, Joavan nanion na sab

CEBU, Philippines - Wala pa gani makahural ang nasubliang mayor sa dakbayan sa Talisay nga si Mayor Socrates Fernandez ang sinagop niining si Joavan nalambigit na usab kini sa kontrobersiya tungod kay niining bag-o lang gipasanginlan kining nanion og pusil ngadto sa gwardiya sa Vista Grande Subdivision, barangay Bulacao Talisay niadtong Sabado sa hapon.

Ang biktimang si Cleto Dandan, 44, taga sitio Mananga 2, barangay Tabunok, Talisay kinsa gibati og kahadlok daling mi-report ngadto sa Talisay City Police Station sa barangay Poblacion kabahin sa giingong pagtion ni Joavan kaniya og kalibre .45 nga pistola.

Si SPO1 Oliver Dacua, duty desk officer niadtong nahitabo ang insidente mibutyag sa Banat News niadtong Mayo, 27, 2010, si Joavan nagsakay og motorsiklo nga misulod sa subdivision.

Ang mga residente sa subdivision mireklamo tungod sa kasaba sa tambutso sa motor ni Joavan ug mimando sa gwardiya nga ipabadlong ang sinagop sa mayor.

Dihang miagi sa pagbalik sa gate si Joavan gihangyo kini sa gwardiya nga pasampongan lang og goma ang tambutso niini aron dili kini mobanha tungod kay mireklamo ang mga residente.

Apan giingong nasuko si Joavan ug misulti nga duna siya’y pusil dayon pasutoy og padagan sa iyang motor.

Niadtong Mayo 29, 2010 adlaw’ng Sabado sa mga alas 3:15 sa hapon mibalik si Joavan sa maong subdivision sakay og kolor green nga Pajero nga nagtangag sa plakang GNZ-357.

Si Dandan miduol ngadto kang Joavan aron sa pagkurtesiya apan nasuko na hinuon ang sinagop sa mayor ug dayong hulbot sa iyang kalibre .45 nga pistola ug gitionan ang gwardiya.

Ang gwardiya mipasangil usab kang Joavan nga gihulga siya sa pag-ingon “ikaw buanga ka ha, pusilon tika ron wala pa raba ta mahuman,” human niini mipasutoy dayon kini sa iyang sakyanan.

Ang amahan ni Joavan nga si Mayor Socrates Fernandez dihang gitawgan sa Banat News sa telepono aron kini kakuhaan og pamahayag apan dili kini makontak. - BANAT NEWS