Disgrasya sa sakyanan upat ka tawo angol

CEBU, Philippines - Upat ka tawo ang nalandig sa tambalanan gumikan sa dinasmagay sa tulo ka mga sakyanan sa managlahing lugar sa lungsod sa Minglanilla niadtong adlaw’ng Biyernes sa managlahing takna.

Ang mga biktima mao si Ricardo Alferez Ragaza, 18, taga barangay Cantao-an, dakbayan sa Naga, James Orbiso Lingaw-lingaw, hingkod, nga taga Villa Leyson, barangay Bacayan, dakbayan sa Sugbo, drayber sa sakyanang pribado nga may plakang YBA 575. Orlando Alburo, hingkod nga taga Peaceville Subdivision, barangay Kinasang-an, dakbayan sa Sugbo ug ang usa ka kauban niini nga wala hiilhi.

Si POl Mark Rosaroso, polis nga ubos sa Field Training Program sa Minglanilla Police Station mibutyag kagahapon sa Banat News nga si Ragaza milabang sa karsada sa barangay Tungkop, dihang nadasmagan kini sa motorsiklong gimaneho sa usa ka menor de edad ug nalagpot ang biktima sa gilay-ong 10 metros niadtong Biyernes sa alas 5:10 sa hapon.

Samtang ang drayber sa motorsiklong nakadasmag kaniya nabagnos usab sa karsada .

Samtang sa pagka-alas 9:40 sa gabii, si Manigos nag-maneho sa Kia Pride paingon sa habagatan gikan sa dakbayan sa Sugbo dihang pag-abot sa highway sa sitio Pungtod , barangay Calajo-an, mikalit siya og u-turn hinungdan nga nadasmagan siya sa mini-bus nga nagsunod kaniya nga gimaneho ni Ronnie Manigos, nga taga sitio Bogo, barangay Kawasan, lungsod sa Aloguinsan.

Nianang pagka- alas 10:30 sa gabii, si Alburo ug ang angkas niining wala hiilhi giingong nagmaneho sa motorsiklo samtang hubog ,gikan sa habagatan paingon sa dakbayan sa Sugbo dihang pag-abot niini sa highway sa barangay Tungkop, midasmag kini sa owner type jeep nga mitabok   paingon sa pikas daplin sa karsada.

Ang maong jeep gimaneho ni Alfredo Gabucan, hingkod,nga taga barangay Inayagan, dakbayan sa Naga.

Nanglagpot sila si Alburo ug ang angkas niini ug pagtugpa niini sa karsada nangabali ang ilang kalawasan.

Ang tanang mga biktima nahilandig sa tambalanan samtang ang mga drayber sa mga sakyanang nalambigit sa maong disgrasya pulos gisukit-sukit dayon sa kapolisan sa Minglanilla. (BANAT NEWS)