2 ka tawo may taptap sa nawong namusil sa Lapu

CEBU, Philippines - Talandugon ang kahimtang sa usa ka lalaki human kini gipusil sa duha ka tawo nga nagtaptap sa nawong sa sitio Camagong, barangay Poblacion, dakbayan sa Lapulapu kagahapon sa kaadlawon.

Ang biktima mao si Nelson Cubia, 23, ulitawo ug residente sa dalan Ompad, barangay Poblacion, dakbayan sa Lapulapu.

Base sa imbestigasyon sa Crime Against Persons Desk sa Lapulapu City Police Office nasayran nga ala 1:35 kagahapon sa kaadlawon samtang nag-inom ang biktima uban sa iyang mga higala, duha ka tawo miduol kanila dayong pamusil ngadto kang Cubia.

Wala mailhi sa mga kaubanan sa biktima ang duha ka tawo gumikan kay nagtaptap kini sa ilang mga nawong apan nagtuo sila nga si Cubia ra ang tuyo sa maong namusil nga daling nakapahilayo sa maong dapit human sa hitabo.

Si Cubia nga nakaangkon og duha ka samad pinusilan sa iyang kalawasan gidali pagdala sa Lapulapu City District Hospital apan gumikan sa kakulangan sa kagamitan sa maong tambalanan gibalhin ngadto sa Vicente Sotto Memorial Medical Center (VSMMC).

Ang kapolisan padayon pang nag-imbestigar ug nag-ila sa mga tawong nagtaptap nga namusil kang Cubia.

Ang kapolisan wala pay tino nga kasayuran sa motibo sa maong pagpamusil diin bugtong si Cubia lang ang tumong sa duha. – BANAT NEWS