Motor nakadasmag og ginang, angkas nakalas

CEBU, Philippines - Usa ang patay ug tulo ang anaa sa kritikal nga kahimtang human madasmagi sa motorsiklo ang usa ka ginang sa iyang pagtabok sa karsada sa barangay Logo lungsod sa Borbon niadtong Domingo sa alas 5:00 sa buntag.

Ang namatay mao ang angkas sa motorsiklo nga si Ernesto Gabito, 19, samtang kritikal ang kahimtang sa drayber sa Honda XRM nga si Wenge Gabito, 22, ingon man ang ikaduhang angkas nga si Jocelyn Jaime, 22.

Gikatahong nadasmagan sa maong motorsiklo si Inoveba Tautho, molupyo sa maong lugar kinsa mitabok sa dalan dihang naatol sa pag-agi sa motorsiklo.

Matud ni PO2 Roy Hortelano sa Borbon Police dihang nahinabi sa Banat News gikan sa syudad sa Sugbo ang motorsiklo paingon sa lungsod sa Medillen.

Apan pag-abot sa nahisgutang lugar kalit nga mitabok sa dalan si Tautho ug nadasmagan kini sa motorsiklo hinungdan nga misaliring usab ang maong sakyanan ug nangalabay ang mga sakay niini.

Daling gihatud ang upat sa Juan Dosado Memorial Hospital apan pagka alas 6:45 sa buntag namatay gyud si Ernesto gumikan sa kagrabe sa kadaot sa lawas nga nahiaguman.

Samtang ang laing tulo daling gibalhin sa tambalanan sa dakbayan sa Sugbo human gihulagway usab kini nga pulos anaa sa talandugon nga kahimtang.     (BANATNEWS)