CEBU, Philippines - Gitaopan sa uhas sa Indian pana ang liog sa usa ka ulitawo kinsa gipareglahan didto sa Sitio Pulangyuta, barangay Looc, siyudad sa Danao sa miaging kaadlawon.
Ang biktima mao si James Eduard Castro, 23 , ulitawo, nga taga barangay Looc samtang ang suspek nailhan lang sa alyas nga “Bulldog”.
Si SPO1 Rodrigo Robli sa Danao City Police Station mibutyag sa Banat News nga ang biktima kauban sa iyang mga barkada naglakaw sa dalan paingon na untang mamauli gikan sa disco sa Sitio Pulangyuta nga nagpiyesta sa maong higayon.
Apan samtang naglakaw sila sa karsada kalit lang nanglupad ang mga uhas sa Indian pana pag-agi nila sa maong lugar ug si Castro maoy nasabak sa liog sa usa ka uhas niini.
Daling gitabang sa iyang mga barkada ang biktima ug nagtaop pa ang uhas sa Indian pana sa liog niini pag-abot nila ngadto sa Danao District Hospital.
Naglisud pagtangtang ang mga doktor sa uhas gumikan sa ka taas sa sima niini busa gibalhin ang biktima ngadto sa tambalanan sa dakbayan sa Sugbo.
Ang maong hitabo padayon pang giimbistigar sa kapolisan sa dakbayan sa Danao pagsuta kun usa ba gyud kadto ka paregla. (BANATNEWS)