Dumon haom sa pagkacabinet member

CEBU, Philippines - Gawas kang Congressman elect Tomas Osmeña sa habagatang distrito sa Sugbo ug Rene Almendras, presidente sa Ayala Land Holdings Inc., nga gipaila aron mahimong sakop sa kabinete sa bag-ong administrasyon, may lain pang Sugboanon nga gitugpo karon diha sa maong puwesto inig lingkod na ni Senador Benigno “Noynoy” Aquino III isip bag-ong presidente sa nasud nga Pilipinhon.

Mao kini gibutyag ni manlalaban Democrito Barcenas, ang presidente sa Noy-Mar Movement Central Visayas kinsa nagkanayon nga gituboy usab nila karon si kanhi provincial board member Victor Dumon nga mahimong kalihim usab sa usa ka nasudnong ahensya sa kagamhanan.

Matud pa ni Barcenas nga kung si Osmeña angay nga ibutang nga kalihim sa National Economic Development Authority (NEDA) ug si Almendras para sa Departmernt of Public Work and Highways (DPWH), si Dumon angayan usab nga maoy ibutang nga kalihim sa Government Service Insurance System (GSIS)

Alang kang Barcenas nga niining bag-ong administrasyon karon, may usa ka Suboanong miyembro sa kabinete ni Presidente Gloria Macapagal Arroyo nga mopahuway na sa pagka-cabinet member ni Presidente Gloria Macapagal Arroyo. Siya mao si GSIS President Winston Garcia kinsa gikuninitan pag-ayo sa mga pagsaway ilabi na sa mga pensionado kansang mga pension kanunay’ng gihamok sa kalangay ug pagkabara.

Hinuon gipasabot sila ni Garcia nga kini naggumikan sa mga kabag-ohang sistema nga gisagop sa GSIS, ang paghimong moderno sa mga paagi aron bisan asang lugara pinaagi sa ATM machine, makakobra ra ang tanang miyembro sa GSIS ug mga pensionado. – BANAT NEWS