Wala suplaye og tubig gipabayad sa bill

CEBU, Philippines - Ang mga molupyo sa sitio Pang-pang, barangay San Isidro, dakbayan sa Talisay mireklamo na, kay duha na ka buwan nga nag-antos sila nga wala suplayi og tubig sa Metropolitan Cebu Water District (MCWD), apan gipaninglan lang gihapon sila sa binuwan nilang bayranan.

Si Eliza Prajes, 37-anyos usa sa mga taga Pangpang nagtibi nga mibutyag kagahapon sa Banat News nga pito sila ka pamilya nga dunay linya sa tubig sa MCWD apan tungod kay wala nay moagas nga tubig sa ilang gripo, nag-antos sila sa pagsag-ob og tubig gikan sa poso artesiano sa ilang lugar. Ang labing nakapadimalas kanila kay puwerting bahoang taya sa tubig nga kinawos gikan sa poso, matud pa ni Prajes.

Tungod kay wala nay laing kasumbongan, si Prajes midangop sa Banat News, pamasin nga tagdon sa taga MCWD ang ilang suliran.

Kini tungod kay naugtas na sila og hinangyo sa MCWD nga pabuhagayan og tubig ang ilang mga gripo, apan wala gayud kini magtagad, sumbong pa ni Prajes.

 Gibati og kapungot ug kalagot sila si Prajes ug mga silingan kay may kawani sa MCWD nga misusi kuno sa ilang kahimtang, unya nagtuo sila nga paagasan na sila og tubig, apan milanat nalang og duha ka buwan nagpabilin gyung wala nay matiti nga tubig sa ilang gripo.

Gibutyag usab ni Prajes nga niadtong normal pa ang agas sa ilang mga gripo magbayad sila og kapin sa P1,000 matag buwan nga ipatik sa ilang MCWD bill, apan dihang gipahubsan sila og tubig, tagkaping P700 ang ilang water bill sa unang buwan.

Ambot naglibog si Prajes kay hangin ra may mogawas sa ilang gripo apan nganong gipabayad sila niini sa MCWD nga unta tubig may angayan nilang bayran ug dili hangin.

Unya sa ikaduhang buwan nga wala silay tubig, nahimo nalang P300 ang ilang bill kay mihinay-hinay na ang hangin nga gibulhot sa ilang mga gripo.

Si Prajes nagkanayon nga sa nanglabay nga huwaw, ang ilang mga gripo moagas sa panahon sa buntag, apan inig-kahapon wala nay agas.

Apan mas bintaha kaniadto kay makapundo man sila og tubig sa buntag nga magamit nila sa panahon sa kagabhion, lahi karon nga sulod sa 24 oras hanghin ray mabati nila sa ilang gripo. – BANAT NEWS