CEBU, Philippines - Misamot na ang kainit ang temperatura nga nabatyagan dinhi sa Sugbu ug posibleng mas mutaas pa ang kainiton niini karong umaabot nga sunod semana.
Sumala pa sa mga tinugyanan sa Philippine Atmospheric, Geophysical and Astronomical Services Administration kon Pag-Asa nga niadtong adlaw nga Huwebes, natala na sa ilang record ang labing taas nga temperatura dinhi sa Sugbu karong bulana nga miabot og 36 degree Celsius.
Sigon sa report nga natala sa buhatan sa Pag-Asa Mactan ang maong labing taas nga kainiton sa temperatura dinhi sa Sugbu mga alas 2:00 sa hapon niadtong adlaw nga Huwebes.
Ang maong record mas taas pa sa 35.8 degree Celsius nga record sa Pag-Asa niadtong Mayo 9, 2010 gikan sa alas 2:00 hangtud sa alas 3:00 sa hapon.
Ang buhatan sa labaw sa Pag-Asa Mactan Oscar Tabada mipasidaan ngadto sa katawhan nga magmatngon nga maigo sa heat stroke kay posibleng motaas pa unya ang kainiton sa panahon dinhi sa Sugbu sa umaabot nga semana.
Nunot niining pasidaan, ang mga opisyales sa kapolisan ug militar dinhi sa tungatungang Kabisay-an nga dunay mga recruits niining panahona mihimo na og mga lakang aron kalikayan ang heat stroke ug casualty sa ilang mga trainees.
Niadtong Miyerkules, usa ka army trainee ang nakalas sa kaulohan atol sa ilang training hinungdan nga gimando na ni Army chief Lt. Gen. Reynaldo Mapagu pag-adjust sa ilang oras sa tanang outdoor trainings nga anha nalang buhaton sayo sa buntag ug sa dayong kilom-kilom sa hapon.
Ang nakalas nga trainee mao si Ericson Pascua kinsa kauban sa gatosang recruits sa labing unang adlaw sa ilang training sa Isabela nakuyapan atol sa exercise apan patay na kini pag-abot sa tambalanan. Laing unom ang nangaluya gumikan sa kainit samtang napulo ang na-dehydrated kon nahutdan og tubig sa lawas.
Ning panahona, adunay 6,200 Army recruits nga gibansay-bansay sa tibuok nasud sumala pa ni Army assistant chief of staff for education and training Col. John Bonafos. Sila bansayon sulod sa 12 ka semana ug dugang pito ka semana alang sa jungle warfare. (BANATNEWS)