CEBU, Philippines - Human sa nasinating padayong pagkuwang sa supply sa kuryente dinhi sa Sugbo namatikdan usab ang pagnihit sa supply sa tubig dinhi sa Metro Cebu Area epekto sa padayong nasinating El Niño Phenomenon.
Ang officers in charge sa Public Affairs Department sa Metro Cebu Water District kon MCWD Edna Enocando mipadayag nga moabot sa 15 mil metro cubico ang kakuwangan sa supply sa tubig karun dinhi sa Metro Cebu matag adlaw.
Ang pagnihit namatikdan sugod ning bulan sa Mayo tungod sa huwaw gumikan kay nagkahubas na ang mga tinubdan nila sa tubig sama sa Buhisan dam nga maoy nag-supply og singko porsiyentong tubig sa MCWD matag adlaw.
Ang laing hinungdan nga gitumbok sa MCWD mao ang kanunay nga pagpatuman og rotation brownouts nga nakaguba sa mga bomba sa tubig sa MCWD.
Ang Sugbo dunay kinatibuk-ang demand sa tubig matag adlaw nga moabot og 170 milyones metro kubiko ug 15 mil metro kubiko niini ang kuwang pagkakarun.
Nabalaka ang mga opisyal sa MCWD nga mosamot pa ang kakuwang sa supply sa tubig kun molanat pa og dugay dugay ang nasinati nga El Nino phenomenon nga moresulta sa pagpanghubas sa nahabiling tinubdan sa tubig nila. – BANAT NEWS