CEBU, Philippines - Samdan sa tiyan ang usa ka mag-uuma dihang giunay kini sa pagpusil sa iyang kauban samtang nag-inom sila didto sa barangay Canto-ud, lungsod sa Balamban sa miaging gabii.
Ang biktima mao si Emmanuel Bono, 46, minyo, samtang ang nakapusil kaniya mao si Ronnie Dumdum, minyo usab nga taga Canto-ud.
Si PO2 Jose Baldicasa sa Balamban Police Station, mibutyag sa Banat News nga ang biktima ug ang suspetsado, nalingaw nga nag-inom sa imnanan ni Ika Claros sa maong barangay uban ang ilang higala nga nailhang si “Onyo”.
Dihang nangalipong na sa ilang gilalang bino, nagkalalis ang biktima ug ang higala niining si Onyo.
Apan ang suspetsadong milaban kang Onyo kalit nga milanit sa iyang armas de fuego ug giluthang ang biktima.
Dihang nahagba na ang biktima sa yuta, misinggit ang suspetsado ug nagkanayon nga “tiwasan ko na!”.
Maayo nalang kay gitabangan kini pag-uwang sa mga tawo nga didto sa maong hitabo.
Nakaangkon og samad pinusilan ang biktima sa iyang tiyan hinungdan nga gihatod dayon kini ngadto sa Balamban District Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo. – BANAT NEWS