Mangulingay natagak sa kahoy nabalian, patay

CEBU, Philippines - Patay ang usa ka mangulingay human kini matagak sa kahoy nga iyang gisak-an samtang namutol og mga sanga sa kahoy nga iyang ulingon diha sa bukirang bahin sa sitio Taktakan barangay Lanipga lungsod sa Consolacion niadtong Miyerkules sa alas 2:00 sa hapon.

Ang patay nang naabtan sa miresponding mga polis mao si Asel Pepito, 23, molupyo sa barangay Luka nga sakop na sa lungsod sa Balamban.

Matud pa ni SPO4 Joseph Yongco sa Consolacion Police dihang nahinabi sa Banat News anha magkuhaan sa kalasangan sa maong bukid ang biktima aron iyang himuong uling.

Sumala pa niini sa wala pa kini mahagbong nakaputol na kini og duha ka kahoy ug dihang misaka na kini sa ikatulong kahoy aksidente kining natagak.

Ang mga molupyo sa barangay Mabini nga sakop sa siyudad sa Sugbo maoy unang nakadiskobre sa maong panghitabo ug gi-report dayon sa kapulisan sa Cebu City Police Office (CCPO).

Gibanabanang sobra sa 10 ka tiil ang gitas-on sa punoan sa kahoy nga nahagbungan sa biktima tungod kay nabali-bali ang kabukogan niini pagtugpa sa batuhong bahin sa yuta. – BANAT NEWS