Sikyu sa M. Lhuillier gibuhian sa CIDG-7

CEBU, Philippines - Gibuhian sa Criminal Investigation and Detection Group (CIDG)-7 ang duha ka security guard sa M. Lhuillier nga ilang giapil og imbitar sa miaging adlaw atol sa ilang pagronda sa sitio Cansaguing, barangay Baring sa lungsod sa Carmen nga miresulta sa pagkapatay sa gipasanginlang lider sa tulisan nga si Joshua Paring.

Ang gibuhian kagahapon sa buntag sa CIDG-7 mao sila si Jesus Morales, 45, nga taga Baring ug Melvin Censio, 30, nga taga Cogon East sa mao nga lungsod.

Samtang ang laing duha nga sila si Rolando Gonzales ug Jonidie Sanico pabiling gitanggong sa CIDG-7 human sila makuhai og tagsa ka mugbo nga kalibre sa armas ug mga buhing bala atol sa maong ronda.

Si Supt. Ritchie Posadas, deputy sa CIDG-7 mitug-an sa mga tigbalita nga ilang gibuhian sila si Morales ug Censio gumikan kay walay saksi nga nagtumbok kanilang aduna silay kalambigitan sa pagtulis sa dressing plant sa M. Lhuillier Pawnshop niadtong Biyernes sa gabii.

Ang maong dressing plant gisulod sa lima ka tulisan ug bugtong si Joshua Paring lang maoy gitumbok sa mga saksi nga maoy lider apan ang upat ka kauban niini pabilin gihapon wala mailhi.

Si Paring mao usab ang headguard sa mga gwardya sa M. Lhuillier kinsa napatay sa mga polis niadtong Miyerkules sa buntag atol sa ronda dihang gipatuman sa kapolisan ang search warrant nga giluwatan ni Hon. Judge Soliver Peras tungod sa paghupot og dili lisensyadong armas apan gikatahong misukol ug nakigpinusilay sa mga awtoridad.

Sila si Gonzales ug Sanico kagahapon sa hapon gikatakdang pasakaan og kaso sa CIDG-7 nga violation sa R.A 8294 kon illegal possession of firearms nga kalapasan sa Comelec Gun Ban.

Apan si Posadas nagkanayon nga duna silay gipaabot kagahapon sa hapon nga laing witnesses aron ilhon sila si Gonzales ug Sanico kun apil ba gyud sa pagtulis niadtong Biyernes.

Samtang sa iyang bahin, ang pangulo sa kapolisan sa lalawigan Sr. Supt. Erson Digal mitug-an nga si Gonzales maoy nagpusil patay kang Nonito Ta-oy niadtong milabay’ng tuig diha sa lungsod sa Carmen.

Si Ta-oy gikatahong tawo ug sinaligan ni Mayor Sonia Pua.

Matud ni Digal dunay saksing nagtumbok kang Gonzales nga maoy gunman sanglit niadtong hitaboa wala magtaptap sa nawong ang mamumuno.  – BANAT NEWS