CEBU, Philippines - Nalandig sa tambalanan ang usa ka babaye human kini dunggaba sa usa ka lalaki nga iyang silingan didto sa Upper Ninggay, barangay Bulasa, lungsod sa Argao kagahapon sa ala l:30 sa kaadlawon.
Ang biktima mao si Delia Gomero, 55, nga taga Upper Ninggay, samtang ang suspetsado mao si Teodoro Landongan, hingkod nga iya ra usab nga silingan.
Si PO2 Benjamin Gerosaga sa Argao Police Station mibutyag sa Banat News nga ang suspetsado ug iyang asawang si Claudia Landongan, nag-away niadtong tungora ug sa kahadlok sa asawa sa iyang bana, midagan kini ngadto sa balay sa biktima aron motago.
Apan ang bana kinsa nagpangusmo sa kasuko, nagdala sa iyang ice picxk ug didto mopuntariya sa balay sa biktima.
Misamot ang iyang kalagot dihang pagsaka niya sa balay, ang biktima kinsa midepensa kang Claudia, maoy gihansakan niya sa iyang ice pick.
Samdan sa walang bahin sa dughan ang biktima ug gihatod dayon kini ngadto sa Don Vicente Sotto Memorial Medical Center, samtang ang suspetsado kinsa nadakpan dayon sa kapolisan nagtingkagol na karon sa prisohan sa maong lungsod. – BANAT NEWS