CEBU, Philippines - Pulos natapsingan sa agtang ang duha ka tawo nga gipusil sa duha ka wala hiilhing lalaki didto sa sitio Kagudoy, barangay Basak, dakbayan sa Lapulapu kagahapon sa alas 5:00 sa kaadlawon.
Ang mga biktima mao sila si Felipe Ybanez Amoro, 24, minyo ug Loreto Aton Catcha, 31 anyos, construction worker, ug pulos molupyo sa Kagudoy.
Si SPO3 Roderict Islet sa kapolisan sa maong dakbayan nga nahinabi sa Banat News miingon nga gikan pang nag-inom ang duha ka biktima sa usa ka tindahan sa maong dapit.
Nanglakaw kini pauli sa ilang panimalay dihang pag-abot nila sa maong lugar may milabay nga multicab nga pasaheroan ug sa pagtuo nila nga kaila nila ang duha ka lalaking sakay sa maong multicab, ila kining gisinggitan aron pakanaugon kay magkuyog sila og lakaw pauli sa ilang balay.
Gumikan niini mihunong ang multicab ug nanganaug ang duha ka pasahero kinsa walay daghang estorya gipamusil dayon sila.
Ang unang gipusil mao si Felipe ug natapsingan sa bala ang agtang niini ug si Loreto kinsa misulay sa paggukod sa duha ka lalaki, nahunong usab dihang natapsingan sa laing bala ang ibabaw sa iyang kilay.
Gihatod dayon sa mga nakasaksi ang mga biktima ngadto sa Mactan Doctors’ Hospital samtang ang mga kriminal gipangita pa karon sa kapolisan sa dakbayan human kini manibat. – BANAT NEWS