CEBU, Philippines - Nasikop sa kapolisan ang usa ka ulitawo human kini magpasalba sa iyang armas de fuego didto sa Sitio Highway, barangay Looc dakbayan sa Danao sa miaging gabii.
Ang suspetsado mao si Chullenc Mata, 18, ulitawo, nga taga Sitio Pulangyuta sa maong dakbayan.
Si SPO4 Edgar Gomez, desk officer sa Danao City Police Station mibutyag sa Banat News nga ilang nadawat ang maong taho gikan ni Roger Baral, usa ka Bantay Bayan Reporter kinsa misumbong nga ang maong suspetsado iyang nakit-an sa maong dapit nga nagpasalba sa armas de fuego niini uban ang grupo sa mga batan-on nga nagtapok tapok sa maong barangay.
Gituohan sa mga kapulisan nga ang maong grupo , miyembro usab sa ‘fraternity’ apan wala lang masuta kun unsang pundoka.
Nasakmit sa kapolisan ang usa ka improvised nga .38 calibreng revolver uban sa buhing bala niini.
Nagkagulkol na karon sa prisohan ang suspetsado samtang atubangon niini ang kaso nga may labot sa Comelec gun ban. – BANAT NEWS