CEBU, Philippines - Upat ka pwesto sa kabarangayan sa dakbayan sa Talisay ang mabakante human ang ilang mga opisyales sa barangay pulos nakadaog sa pagka-konsehal sa milabay’ng piniliay.
Si Councilor-elect Celiapo “Semy” Cabuenas ang mobuhi na unya sa iyang pwesto isip kapitan sa barangay Lagtang ug samtang ang iyang mga party mates nga sila si Valeriano “Val” Ylanan ug Ricky “Choy” Aznar ang mobuhi usab sa ilang mga posisyon isip mga kagawad sa barangay Linao ug Poblacion.
Ang tulo napiling mga konsehal sa milabay’ng eleksiyon niadtong Mayo 10, 2010 maisip nga mga first timers nga masakop sa konseho sa siyudad nga ubos sa Alayon-Nacionalista Party (NP).
Si Ylanan maoy napiling ikatulong konsehal karon diin nakabaton kini og 35,528 botos samtang si Aznar ug Cabuenas ang napiling ikalima ug ikaunom nga konsehal kinsa nakakuha og 35,313 botos ug 31,863 botos.
Sa mga neophyte, ang 18-anyos nga si councilor-elect Eduardo “Digul” Gullas III, apo ni Kongresista Eduardo Gullas maoy napiling first councilor sa Talisay ug nakakuha og 38,437 botos.
Si Cabuenas nagkanayon nga ang iyang ig-agaw nga si Ronnie Cabuenas nga maoy first councilor sa Lagtang maoy mopuli sa iyang pwesto isip kapitan sa barangay.
Gawas sa pwesto isip kapitan sa barangay buhian usab ni Cabuenas ang iyang posisyon isip Bise Presidente sa Association of Barangay Captain (ABC).
Matud ni Cabuenas nga wala pa siya makahibawo kung kinsay mopuli niya sa maong pwesto ug posibleng dunay ipahigayong eleksiyon ang ABC aron magpili sa mopuli kaniya.
Si ABC president Osmundo Manreal Jr. kinsa mikandidato sa milabay’ng eleksiyon isip konsehal sa siyudad ug si Konsehal Aaron Capala ubos sa LP ang parehong naparot sa milabay’ng eleksiyon.
Si Danilo Caballero ug Atty. Romeo Villarante sa oposisyon ang mipildi ni Manreal ug Capala sa milabay’ng eleksiyon. (BANATNEWS)