Gikan misimba gibanhigan sa nagmotor

CEBU, Philippines - Patay ang usa ka tawo nga gikan pa misimba kuyog sa iyang asawa human gipusil alas-3 pasado ang takna sa hapon sa miaging Domingo sa dalan P. Burgos ug eskina Gerardo Ouano Avenue sa barangay Alang-Alang, dakbayan sa Mandaue ug nadakpan usab sa follow up operation sa kapolisan ang duha ka mga suspetsadong nagsakay og motorsiklo.

Ang namatay mao si Horacio Villamor, 34, taga dalan Sotero Cabahug sa barangay Ibabao, sa nahisgutang dakbayan samtang ang duha nga nadakpan mao sila si Edcel Reyner Cabahug, 23, ug Joseph Perez, 31, nga pulos taga sitio Sudlon sa barangay Ibabao.

Si PO3 Arthur Cuyos sa kapolisan sa Presinto 1 sa Centro Police Station nga nahinabi sa Banat News miingon nga gikan pang misimba sa Christ the King sa barangay Alang-Alang ang biktima kuyog sa iyang asawa nga si Marina.

Nagmaneho kini sa iyang sakyanan pauli dihang naabot sila sa eskina sa nahisgotang dalan kalit lamang kining gipusil sa gikasugat nga duha ka tawo nga nagsakay og motorsiklo.

Ang biktima nakamaneho pa paingon sa dalan Sotero Cabahug ug gitabang sa mga tawo pagdala sa Cortes General Hospital apan gideklarar kini sa mga doktor nga dead on arrival.

Si PO3 Cuyos miingon nga namay-ongan sa asawa sa biktima ang mga suspek hinungdan nga nasundan sila sa mga polis ug nadakpan.

Sa pasiunang imbestigasyon sa Investigation Detection and Management Bureau (IDMB), nasuta nga gikabikil sa biktima ang mga suspek sa miaging piyesta. (BANATNEWS)