CEBU, Philippines - Naluwas ang kinabuhi sa pito ka mga tawo luwan sa usa ka van human girakrakan sa mga armadong tawo nga nagsakay sa usa ka multicab didto sa Barangay Kan-anan, lungsod sa Tabogon kagahapon sa kaadlawon.
Ang drayber nga si Joel Toledo, hingkod, maoy nagmaneho sa van nga gipanag-iya ni Sigfred Duterte, kandidato sa pagka-mayor sa lungsod sa Tabogon.
Matud pa ni Toledo nga sa ala 1:00 kagahapon sa kadlawon iyang gipasakay ang pito ka mga sinaligan ni Duterte nga nagsusi kun wala ba hasola ang ilang mga sakop nga taga Kan-anan sa kampo ni Mayor Eusebio “Eboy” Dungog sa Tabogon kinsa nagpapili pag-usab.
Sa ilang pagpamauli. nasugatan nila ang usa ka multicab nga gilulanan usab og mga tawo nga nagsul-ob og fatigue nga senina nga may mga baby armalite nga armas.
Unya mihunong kini ug dihang mibalik ug gisundan sila girakrakan ang ilang van ug maayo nalang kay gigamit niya ang iyang kaigmat ug abilidad sa pagdala og sakyanan pinaagi sa pag-exibition sa pagpa-ekis-ekis sa dagan niini hinungdan nga nanglahoy lang sa hangin ang mga bala sa baby armalite nga gitira kanila ug wala gyuy bisan usa sa iyang pasahero nga nasabak sa bala.
Hinuon wala gyud masuta ni Toledo kun ang mga nangrakrak kanila mga sakop ba sa kampo ni Dungog, apan iyang gikompirmar nga init kaayo ang panagribal ni Duterte ug ni Dungog.
Samtang si P/SInsp. Alexander Ancao, hepe sa Tabogon police station mikompirmar sa maong hitabo, walay nangangkon nga nangrakrak. (BANATNEWS)