9 'goons', mga armas 'sakmit

CEBU, Philippines - Siyam ka armadong lalaki ang gidakop sa lungsod sa Tabuelan kagahapon sa buntag pinaagi sa search warrant nga giluwatan ni Regional Trial Court (RTC) Branch 10 Judge Soliver Peras sulod sa panimalay sa barangay kapitan sa Kantabaon sa maong lungsod.

Ang nasikop mao sila Brendon Maglasang, Soriano Solon, Ferdinand Jumao-as, Walter Paston Miano, Baltazar Yestubio, Dennis Sollano, Adonis Almonacin ug ang anak sa kapitan nga si Joel Almonacin.

Usa ka joint operation sa Regional Intelligence Unit ug Regional Intelligence Division ang gihimo sa kapolisan human makadawat og report sa presensya sa mga armadong lalaki sa maong lungsod.

Ang target sa search warrant mao ang panimalay ni Kapitan Julieto Almonacin ug diha nila maabti ang siyam nga gidudahang mga goons ug nakuha usab sa balay ang mga high-powered firearms.

Nasakmit sa kapolisan ang duha ka caliber.45 pistols, usa ka 9mm Ingram, upat ka .357 magnum revolver, tulo ka magazine sa kalibre .45, duha ka magazine sa Ingram, 29 rounds sa buhing bala sa kalibre 9mm ug 24 ka rounds sa kalibre .45.

Matud pa sa hepe sa RID7 Chief Insp. Romeo Santander nga ang operasyon may kalambigitan sa nahitabong strafing incident sa maong lungsod diin ang gitumbok nga suspetsado mao ang ABC President ug kapitan sa barangay Kantabaon nga si Kapitan Deolito Almonacin.

Sa pakighinabi sa Banat News ni Adonis Almonacin mihimakak kining mga goons sila, matud niya igo ra siyang natulog sa balay sa kapitan, samtang si Maglasang nangangkong gi-hire sila aron pagtukod og kural nga butangan og livewire. - BANAT NEWS