CEBU, Philippines - Usa ka Korean nga bilanggo sa Mandaue City Jail ang gituuhang naghikog ug namatay kagahapon sa hapon diha sulod sa iyang selda.
Ang namatay mao si Jhang Il Wun, nga nabalhog niadtong Oktobre 19 sa miaging tuig tungod sa kasong Human Trafficking.Si JO1 Joselito Cruz nga jailguard sa nahisgutang bilanggoan nga nahinabi sa Banat News miingon nga nadiskubrehan sa mga kaubang bilanggo si Jhang nga nagbitik og liston sa sapatos sa iyang liog nga maoy gituuhang hinungdan sa kalit niining paglagom. Daling gidala sa Mandaue City District Hospital si Jhang apan ang mga doktor mideklarar kaniyang dead on arrival.Gikatakdang ipaawtopsiya ang patay’ng lawas sa maong langyaw aron tinuon kun unsay gikamatyan niini o wala ba kini pasipad-i. - Romeo Limpangog ug Bong Soriano (BANAT NEWS)