Magtiayon gi-granada patay

CEBU, Philippines - Patay ang magtiayong tigulang human labaya og granada ang ilang panimalay samtang nahinanok og katulog sa ilang balay diha sa sitio Tapon barangay Napo siyudad sa Carcar kagahapon sa ala 1:00 sa kaadlawon.

Ang duha giilang sila si Felipe Nacua, 72, ug asawang si Felisicima Nacua, 70, nagpuyo sa nahisgutang lugar.

Sa paghimo ning balita wala pay matumbok ang kapulisan nga mga responsable sa maong krimen ingon man ang pagtino sa motibo niini.

Matud ni PO2 Paulino Sanchez Jr., sa Carcar City Police dihang nahinabi sa Banat News ang magtiayon nangatulog niadtong tungura dihang miabot ang gikatahapan ug gilabay og granada ang balay.

Ang mga silingan sa duha ka biktima nakamata nalang sa kusog nga buto dungan sa pagkasunog sa balay sa magtiayon hinungdan nga ilaha dayong gisusi ug ilahang naabtan ang duha nga pulos nagbuy-od ug nagkadugo ug wala nay mga kinabuhi.

Ang silingan sa magtiayon nga si Roberto Nava, mitug-an sa kapolisan nga namubo siya sa iyang mga tanom niadtong higayona tungod sa kainit sa panahon dihang iyang nakit-an ang usa ka wala mailhing tawo nga naghinay og paduol sa panimalay sa mga biktima ug dayon adunay gilabay sa balay sa mga Nacua ug daling mikaratel palayo dangtan pila ka gutlo miulbo kini.

Si Sr. Supt. Erson Digal, hepe sa Cebu Provincial Police Office mimando na pagpalawom sa imbestigasyon.

Nakadawat og impormasyon ang kapolisan nga mibalhin og puyo ang duha diha sa maong lugar tungod kay gisunog usab ang ilang balay kaniadto sa laing dapit.  - Uban ni Jose Adrian Sollano (BANAT NEWS)