Flash cards sa PCOS machines gi-recall, distribusyon gioktaba

CEBU, Philippines - Gisuspenso una ang pagpanghatud sa Commission on Elections sa mga Precinct Count Optical Scan kon PCOS machine sa kalungsuran sa lalawigan ug sa dakbayan sa Sugbu ug sa rehiyon tungod sa kakulian sa configuration.

Si Comelec executie director Jose Tolentino Jr.mipagawas og kamandoan sa tanang Comelec offices sa nasud paghimo niini samtang wala pa makurihii ang nakitang depekto sa makina.

Sumala pa ni Provincial Election Supervisor Atty. Lionel Marco Castillano lakip sa gipahunong mao ang mga testing and sealing sa mga PCOS machines. Nakamatikod ang Comelec og depekto didto sa Luzon atol sa pag-testing sa mga makina didto. Sa nasudnong balita niadtong milabay’ng adlaw wala magtukma ang counting sa makina sa manual counting nga gihimo. Giklaro hinuon ni Castillano nga dili na kinahanglanon pang ipa-recall ang kapin sa 200 ka mga PCOS machines dinhi sa Sugbu.

Si Castillano mipasalig nga madayon ang gikatakdang testing and sealing sa PCOS machine dinhi sa Sugbu karong adlaw’ng Biyernes una pa kini ipang-apod sa matag presinto sa kalungsuran.

Dihang gipangutana sa Banat News kun may igo pang panahon sa pagmuntar sa mga makina sa mga clustered precincts sa kalungsuran, si Castillano nangangkong ang ilang buhatan dili maapiki apan kinahanglanon nilang mag “double time.”

Kagahapon sa udto gipa-recall sa Comelec ang tanang flash cards sa 75,000 PCOS machines ug mipasalig nga kun mailisan na kini ipadayon ang testing sa mga makina ug uban pa sa dili pa ang piniliay. –  BANAT NEWS