Nanawagan pagklaro sa isyu sa mental health ni Noynoy midaghan

CEBU, Philippines - Nagkaanam og kadaghan ang panawagan ngadto kang Liberal Party standard bearer Sen. Benigno “Noynoy” Aquino kabahin sa alegasyon sa psychiatric evaluation.

Una nang napublikar ang panawagan kabahin niini ug gipasangil sa LP nga ‘black propaganda’ gikan sa higpit nga kaatbang ni Aquino nga si Nacionalista Party Sen. Manny Villar, butang nga gihimakak usab sa naulahi.

Nadugang sa nanawagan karon ang Pwersa ng Masang Pilipino (PMP) kagahapon aron ipakita sa publiko ang kamatuoran kabahin niini.

Ang tigpamaba sa PMP nga si Ralph Calinisan sa gipagawas nga pamahayag mihisgot nga nalatid sa Konstitusyon sa nasud nga adunay katungod ang katawhang Pilipino masayod sa panglawas sa usa ka public official.

“In a democracy, this provision guarantees the people’s right to know about the president’s health, contrary to secretive practices in totalitarian governments,” pasabot pa niini.

Gihimakak nang daan sa LP ang maong dokumento ug gihulagway nilang peke kini. Apan giingong padayong nakadawat og mga impormasyon gikan sa kasaligang tinubdan ang PMP nga tinuod ang maong report.

Pipila ka mga lider sa senado ang mipadayag usab nga usa ka balidong pangutana ang isyu panglawas sa usa ka presidential aspirant tungod kay ground kini aron matangtang sa pwesto ang usa ka opisyal kun dili na makaserbisyo sa katawhan.

Si Senate President Juan Ponce Enrile ug Minority Leader Aquilino Pimentel Jr. parehong miingon nga ang publiko adunay katungod nga masayod sa kahimtang sa pangisip sa opisyal ilabi na ang naa sa labing taas nga posisyon.

Samtang si Enrile nagkanayon nga ang paghatag og kasigurohan sa katawhan nga himsog ug walay kakulian ang panglawas sa gustong mahimong pangulo makiangayon lamang.

Sa samang higayon, ang NP padayong nanawagan sa ABS-CBN ug mihatag kanila og kagawasan sa pagpublikar si kinsa sa ilang miyembro ang mipagawas sa maong dokumento.

Si Adel Tamano, usa sa mga senatorial bet sa NP nagkanayon nga mas makadaot sa NP ang maong dokumento imbes nga kang Aquino.  –  BANAT NEWS