CEBU, Philippines - Duha ka lalaki ang nasamdan human sa nahitabong dinunggabay sa managlahing oras sa syudad sa Sugbo kagahapon sa kaadlawon.
Pasado alas 12 sa kadlawon sa sitio San Jose barangay Lahug, usa ka Arriel Arriesgado, 41, nakaangkon og samad dinunggaban sa iyang likod human dunggaba sa wala mailhing kauban sa giilang si Brian De Catalina.Base sa imbestigasyon sa kapolisan, ang biktima igo lang miulang kang De Catalina kay gikulata niini si Andre Regis nga higala sa biktima.
Apan sa iyang pagduol, kalit siyang gidunggab sa wala mailhing lalaking kauban diay ni De Catalina diha sa likod ug daling nangikyas luwan sa usa ka Jiffy nga may plakang GBK-535, ang maong sakyanan na-recover sa kapolisan dili layo sa nahitaboan. Si Arriesgado nadala sa Cebu City Medical Center.
Sa laing bahin, nalandig usab sa samang tambalanan ang usa ka traysikad driver nga si Ajadon Kurais, 30, taga sitio Pedro barangay Duljo-Fatima human dunggaba sa wala mailhing lalaki diha sa sitio Puntot barangay Mambaling. – BANAT NEWS