Hubog nanion sa iyang armas sikop

CEBU, Philippines - Natingkagol sa prisohan sa Talisay City Police Station (TCPS) ang usa ka giingong hubog nga gipasanginlang nanion og armas de fuego ngadto sa usa ka 71-anyos nga lolo didto sa sitio Kawayan, barangay Tabunok, dakbayan sa Talisay sa miaging gabii.

Ang nagkagulkol na karon sa bilanggoan mao si Robert Villanueva, 39, nga taga Kawayan, samtang ang senior citizen nga iyang gitionan mao si Cepriano Suares, nga taga sitio Uldog, barangay Poblacion sa maong siyudad.

Si SPO1 Benjamin Sebellita sa TCPS mibutyag sa Banat News nga naimbargo niya gikan kang Villanueva ang usa ka kalibre .38 nga revolver nga nagtangag og unom ka buhing bala.

Base sa imbestigasyon nga gihimo sa kapolisan, nasayran nga ang biktima nagkaon sa usa ka tindahan sa maong lugar, dihang ang suspetsado kinsa giingong hubog, kalit nga miabot ug sa walay hinungdan, gitionan sa hinagiban niini ang biktima.

Apan gidibuwenas ang biktima kinsa mikurog na ang suwang sa kakuyaw, kay diha si SPOl Sebellita sa duol ug dihang nakita niini ang suspetsado nga nagwara-wara sa iyang armas, giduol ug gisakmit dayon ang hinagiban niini.

Nasalbar sa kakuyaw ang biktima samtang ang suspetsado gipaslak dayon sa prisohan ug atubangon niini ang kaso nga may labot sa gun ban nga gipatuman sa Comelec. – BANAT NEWS