CEBU, Philippines - Lig-on ang baruganan ni Mayor Jonas Cortes sa dakbayan sa Mandaue sa pagprotiher sa katungod sa pito ka mga organisasyon nga maoy benepisyaryo sa on site socialized housing project sa barangay Guizo, Mantuyong, Tipolo, ug Subangdaku sa dakbayan sa Mandaue, matud pa ni manlalaban Francisco Amit, tigpamaba sa mayor.
Ang maong baruganan gisagop ni Cortes gikan kang kanhi Mayor Alfredo Ouano sa maong dakbayan kinsa maoy naghatag sa deed of donation ngadto sa mga urban poor nga sakop sa Lower Tipolo Homeowners Association, Inc.; Pro-Masa Maharklika Tipolo Homeowners Association, Inc.; Kaluwasan Homeowners Association, Inc.; Malibu, Matimco Homeowners Association, Inc. Santa Cruz Guizo Homeowners Association, Inc., ug Santa Cruz Village Homeowners Association, Inc.
Si manlalaban Francisco Amit mihimo sa maong pamahayag human ang hugpong nga FEDMACUPI laing kapunongan sa mga urban poor sa dakbayan nangayo na sa titulo ug ubang mga papeles sa yuta sa kagamhanan nga gipanghatag ngadto sa tinuoray nga mga hugpong sa urban poor sa dakbayan nga maoy nagpuyo karon sa maong mga yuta.
Matud pa ni Amit nga ang mga sakop sa FEDMACUPI dili maoy nagpuyo sa usa ka ektaryang luna sa kagamhanan nga gidonar ngadto sa tinuoray nga nanagpuyo niini. – BANAT NEWS