CEBU, Philippines - Atubangan sa gatusan ka mga kababayen-an mipirma sa covenant si kongresista ug Mandaue City mayoralty candidate Nerissa Soon-Ruiz ug pili-onon pagka kongresista sa sixto distrito Luigi Quisumbing nga nisaad pag-atiman sa nag-unang panginahanglan sa kababayen-an sa dakbayan.
Dili mominos 150 ka mga kababayen-ang sakop sa Kababayen-an Alang sa Kalambuan ang misaksi sa gipahigayong covenant signing sa headquarters sa barangay Bakilid Mandaue.
Ubos sa maong gipirmahang covenant ang pasalig paghatag og libreng edukasyon sa mga kabus nga molupyo sa dakbayan ug tibuok distrito sa higayun nga silang duha modaug sa eleksyon karung Mayo.
Apil na niini ang paghatag og medical assistance ingon man hospitalization sa mga kabus nga pamilya ug ang pagtukod og kooperatiba alang sa kababayen-an nga maghatag unya og livelihood program sa kababayen-an sa maong lugar.
Gihangop sa kahugpungan ang covenant signing ug naglaom sa gipanaad sa duha ka kandidato kanila isip nag-unang agenda ini’g lingkod nila sa pwesto kun palaron.
Si Ruiz maoy moatbang ni incumbent Mandaue City Mayor Jonas Cortes samtang si Quisumbing maoy moatbang sa igsuon ni Mayor Cortes nga si Ariston Balodong Cortes pagkakongresista. - BANAT NEWS