CEBU, Philippines - Mitiyabaw na ang kandidato pagkakongresista sa ikaunom nga distrito nga si Areston Baludong Cortes III sa giingong padayong ‘operation taptap’ nga binuhatan sa wala mailhing grupo matag gabii.
Si Cortes nagkanayon nga ang wala mailhing grupo gikatahong manaptap sa ilang mga posters sa Liberal Party lakip na sa iyang igsuong si Mayor Jonas Cortes.
Ang mao nilang mga posters gikatahong panabunan sa mga posters sa ilang mga kaatbang apan naglisod sila pagtumbok kun si kinsa kanila tungod kay si Cortes nakigsakbang sa pagka-kongresista batok nila ni Konsehal Victor Biaño nga independenteng kandidato ug kanhi Provincial Board Member Gabriel Luis Quisumbing nga ubos sa One Cebu ug Lakas Kampi CMD.
Mibahad si Cortes nga kun duna silay masakpan sa akto ilaha gyud kining taralon sa hukmanan.
Si Quisumbing pagbisita dinhi sa The Freeman kagahapon miangkong dunay sakop niyang napasakitan tungod sa maong alegasyon ug kini mitambag sa mga sakop nga sa liwas eleksyon nalang mopasaka og kaso aron dili isipong election issue ang nahitabo ug makamugna hinuon og kagubot. - BANAT NEWS