Tomas mi-deny nga naospital; Pagkahugno sa laing edipisyo gisaway sa kaatbang nga si Atan

CEBU, Philippines - Gihimakak ni Cebu City Mayor Tomas Osmeña ang report nga na-admit kini sa usa ka pribadong tambalanan human makuyapi samtang nakigpulong-pulong sa mga kaalyado ug supporters sa South Road Properties ug mihulagway nga angayang masubo ang mga kritiko niini tungod kay dako siyang buhi.

Sa pakighinabi sa The Freeman, igsuong pamantalaan sa Banat News kang Osmeña gihimakak niini ang maong report ug mihulagway nga lain na usab kining intriga timaan lamang nga nagkaanam na og kapilde ang iyang mga kaatbang.

Ang text gikatahong gikan sa usa sa mga kandidato sa pagkakonsehal sa Bando Osmeña Pundok Kauswagan ang giingong ‘source’ sa maong report nga ang mayor nagpatan-aw sa usa ka pribadong tambalanan mayor human malipong ug nakuyapan.

Apan gipasabot sa mayor nga niadtong Sabado sa gabii mitambong siya og unom ka pulong-pulong sa barangay Kinasang-an ug milahos sa nahugmak nga edipisyo sa IT Park, human niini nagpa-foot massage siya sa Crossroads ug nakigkita sa mga higala sa usa ka kan-anan ug milahos sa iyang balay.

Kagahapon sa buntag, laing pulong-pulong ang iyang giatubang nga diin gitambungan og gibana-banang 100 ka tawo sa barangay Labangon nga magsilbing testigos niya nga wala gyud siya makuyapi ug ang maong report sa SRP paukyab lamang.

Sa laing bahin, gisaway ni south congressional district aspirant Jonathan Guardo ang kaatbang nga si Mayor Tomas Osmeña sa kapakyas niini sa pagsigurong milihok ang serbisyo alang sa publiko partikular na ang Office of the Building Officials tungod sa duha na ka insidente karong bulana nga may nahugmak nga edipisyo sa dakbayan.

Sa gipadalang pamahayag ni Guardo gitumbok niini ang nahugmak nga gitukod nga building sa Asiatown IT Park sa barangay Lahug nga miangol og tulo ka mga trabahante ug gihulagway niya kining timailhang wala nay klarong pagdumala ang dakbayan karon.

“What's going on in City Hall? Who's in charge?” pangutana pa ni Guardo.

Kahinumduman nga niadtong Sabado sa gabii, kalit nga nahugmak ang usa ka bahin sa gitukod nga extension sa call center nga Aegis People Support building sa IT Park nga nakaingon sa pagkaangol ni Jonathan Arquillano,41, ug Billy Abarquez nga pulos mga mason. Ang maong edipisyo gikatahong gibuhusan niadtong tungura diha sa third floor og minasang semento gikan sa usa ka truck nga migamit og crane apan kalit kining nahugmak ug nangatangtang ang mga kabilya ug uban pang scaffoldings.

Sayo niining bulana, kalit nga nahugmak ang firewall sa gitukod nga mall diha sa barangay Tisa ning dakbayan nga nakapatay og lima ka tawo, nasuta sa OBO nga ‘hilaw’ pa ang semento maong nahugmak kini.

Sa gipadalang pamahayag ni Guardo nanghinaot kining dili basulon sa mayor ang OBO tungod niini ug angkunong maong nahitabo ang susamang aksidente gumikan sa kapabayaan niini pagdumala sa siyudad, susama sa nahitabo usab sa Cebu City Medical Center nga gibasol gihapon sa mayor ngadto sa mga kawani maong palpak ug dili maayo ang serbisyo sa mga konstituwente sa dakbayan.

Matud pa niini sukad nga nagpunay og balik sa Estados Unidos ang mayor gumikan sa sakit niining kanser sa pantog kanunay na kining absent maong napasagdan na ang dakbayan bisan gidumala kini ni Bise Mayor Michael Rama nga gihulagway gihapon niining ‘incapable.’ – BANAT NEWS