CEBU, Philippines - Namatay ang usa ka pest control technician human niya bitka og bakus ang iyang liog ug nagbitay sulod sa ilang pansayan sa gawas sa ilang balay sa dalan DM Dimataga, barangay Poblacion, dakbayan sa Lapulapu sayo sa buntag kagahapon.
Ang namatay mao si Marlon Quino Abad, 28, minyo, nga nagtrabaho isip pest control technician sa General Milling Corporation (GMC) sa maong dakbayan.
Si SPO3 Frederict Islet sa homicide section sa kapolisan sa Lapulapu mibutyag sa Banat News nga si Marichu, nga maoy asawa sa naghikog maoy unang nakakita sa iyang bana nga wala nay kinabuhi samtang nagkombabit kini sa sagbayan sa pansayan kansang liog maayong pagkatuok sa iyang bakus.
Matud pa ni Marichu nga mitrabaho pa ang iyang bana niadtong Huwebes, apan nahibulong siya nganong wala kini mahiuli sa ilang balay sa pagka-gabii, kay nasangit diay sa paghikog.
Si SPO3 Islet miingon nga ang bakus gisumpayan og nylon nga pisi kansang tumoy gigaid didto sa sagunting sa pansayan.
Hinuon walay timailhan sa foul play ang lawas ni Abad, matud pa sa kapolisan. (BANATNEWS)