Film showing sa Talisay Opposition Pagpakauwaw-Bacaltos

CEBU, Philippines - Si Talisay City administrator ug campaign manager sa administrasyon Richel Bacaltos mihulagway nga usa ka pagpakauwaw sa siyudad ang gipakita sa film showing sa oposisyon atol sa pagpangampanya.

Ang giingong film showing sa oposisyon nagpakita sa mga basura nga naghuot sa kanal ug sapa sa Talisay ug dunay opisyal usab sa siyudad nga gipakitang natulog atol sa sesyon.

Si Bacaltos sa pakighinabi niini sa Banat News nagkanayon nga wala sila maapektohi sa mga gipagawas sa oposisyon diha sa ilang film showing ug gani ang administrasyon naggama usab og ilahang film showing diin ilang gipakita ang mga kaayohan ug mga proyektong nabuhat ni Mayor Socrates Fernandez sa Talisay. Apan matud niini, wala nila kini i-download sa internet tungod sa kabalakang ma-pickup unya usbon o i-distorted.

Gipasabot ni Bacaltos nga kadtong video nga gipakita sa oposisyon sa ilang film showing nga introductory sa mayor, video kadto sa slaughter house diin ang siyudad nakadawat og pasidungog apan giguba kini og gi-edit sa oposisyon ug gibalik ug upload.

Niadtong Sabado sa milabay'ng semana ang administrasyon nagsugod og pasalida sa ilang film showing diha sa barangay Cansojong diin sa maong film showing gitubag sa mayor ang tanang mga isyu nga gisagpa batok sa administrasyon. (BANATNEWS)