CEBU, Philippines - Nakakita og ebidensya ang Provincial Women’s Commission (PWC) nga naabuso gyud ang katungod ug dignidad sa kababayen-an sa gipahigayong Carmen Rain Dance 2010 nga gireklamong law-ay sa mga opisyal ug residente sa lungsod.
Kini gumikan sa pagpakaligo og beer sa mga babaye samtang nagsayaw ibabaw sa stage atubangan sa mga nanan-aw nga mugbo kaayo og mga sapot base sa imbestigasyon sa PWC.
Gawas pa niini nasuta usab nga dili lamang mga hamtong ang nakakita sa maong pasundayag kondili hasta kabataan gumikan kay selebrasyon usab kadto sa Sinulog sa Carmen. Ang PWC nakakuha og kopya sa video footage sa maong show.
Matod ni Atty. Socorro Enriquez Belarmino ang lead investigator sa PWC gitakda nilang iduso ang resulta sa maong imbestigasyon ngadto sa Hunta Probinsyal ilabina kang bokal Agnes Magpale kinsa maoy morekomendar kun unsang lakang ang ilang buhaton batok sa nagpasiugda sa maong pasundayag.
Ang konseho una nang nipasar og resolusyon nga nag-awhag sa hunta probinsyal paghimo og imbistigasyun sa maong law-ay nga pasundayag nga naka-apektar sa katungod ug nakaubos sa moral sa mga kababayen-an sa lungsod. (BANATNEWS)