Kandidato suportado og druglord?

CEBU, Philippines - Usa ka grupo sa mga batan-ong mipailang nakigbatok sa ginadiling drugas milusad sa kampanya batok sa gitumbok nilang narco-politico sa siyudad sa Sugbo.

Nunot niini, gihulagway sa grupo si Bise Mayor Michael Rama nga “public enemy number 1” tungod sa iyang pagkasuod sa usa ka gidudahang druglord sa siyudad sa Sugbo, akusasyon nga daling gihimakak sa bise mayor.

Si Jimboy Tiongko, lider sa grupong "Krusada batok sa Drugas" nagkanayon nga si Mayor Rama nalambigit kang Crisostomo Llaguno nga naila sa dakbayan nga "Tata Negro" ug nag-atubang og kasong pagduso’g gidiling drugas.

Ang grupo natukod niadtong 2001 sa dakbayan ug si Tiongko aktibo sa adbokasya batok sa gidiling drugas. Milansar kini pagka-konsehal sa dakbayan isip independenteng kandidato sa unang distrito. Mang-apod-apod ang pundok og mga itom nga stickers nga nagkanayon “NO TO DRUGS.”

Gipasabot ni Tiongko nga itom ilang napiling kolor pagkondenar sa gibuhat ni Rama.

Sa press conference kagahapon, giasoy ni Tiongko nga mibuto kining maong isyu sa miagi pang tuig sa dihang miabot ang taho kang Mayor Tomas Osmeña nga si Rama nanawag sa usa ka raiding team nga mironda sa balay ni Llaguno. Matud pa, tungod sa interbensyon ni Rama, wala masikop si Tata Negro.

Si Rama usab nataho nga maoy guest speaker sa usa ka basketball tournament diha sa Sambag 2 nga gipasiugdahan ni Llaguno.

Nagkanayon si Tiongko nga migrabe pag-ayo ang kahimtang sa gidiling drugas sa dakbayan sulod sa miaging katuigan ug dili gyud angay nga ang sunod nga mayor usa ka suod nga higala sa usa ka druglord.

"Unya na diay kita moreklamo batok kang Rama kun modaog siya human sa piliay? Karon kita motingog aron di siya mapili nga pagka-mayor," matud pa niya.

Gitumbok usab si Tata Negro nga aktibong mitabang kang Rama sa iyang pagpangampanya sa north district ug kandidato usab sa pagka-konsehal isip independente.

“Mayor Tom malooy tawn ka namo nga taga siyudad sa Sugbo, ayaw mi tagai og mayor nga nalambigit sa druga,” matud ni Tiongko.

Dugang pa ni Tiongko nga nakit-an niya si Rama nga misulod sa usa ka videoke joint sa uptown area niadtong Miyerkules Santo, Marso 31 sa alas 10 sa gabii. Ang maong videoke joint gikatahong gipanag-iya og negosyante nga gi-imbestigar sa mga awtoridad human gilambigit sa drugas.

Ilang nasayran nga nag-inum-inom ug nagkanta-kanta si Rama ug pagkahuman igo lang kining mipirma sa bayranan.

Si Rama sa iyang bahin kusganong mihimakak nga siya usa ka protektor og druglord dinhi sa dakbayan.

“Dili na tinood oy, nganu gud tawn, wala na sila’y laing nahuna-hunaan, kusug kaayo na sila magtumotumo og mga estorya nga dili mao. Wala ko gipa-edukar sa akong mga ginikanan nga dili nako gamiton akong utok,” matud ni Rama.

Gikataw-an usab niya ang alegasyon nga siya usa ka ‘guest speaker’ sa usa ka basketball tournament didto sa Sambag 2.

“Sa ato pa, ang kadtong tanang mga tawong nanan-aw didto sa Sambag 2 mga protektor usab to sila?”

Misaway siya sa lider sa maong grupo nga si Tiongko.

“Magbantay siya sa iyang gipangsulti, papangitaa na siya og mga legal nga basehan, kanang iyang mga gipangsulti, puro mga tinunto,” sumala pa ni Rama.

Iya usab nga gihimakak nga wala siya makaadto sa uptown area atol sa Miyerkules Santo ug gani, 15 ka simbahan ang iyang giadtoan niadtong semana santa.

“Ang ako lang ikasulti ana nila, basin sila ang nag-drugas kay naguba na man ilang mga utok,” matud ni Rama. (BANATNEWS)